Բարի գալուստ «Զվարթնոց» էլեկտրոնային կայք:
Այս կայքի ստեղծումը «Զվարթնոց» տեղեկատվական-վերլուծական կենտրոնի առաջնահերթ նպատակն էր, իսկ կենտրոնի ընթացիկ գործությունը կլինի կայքի տեղեկատվական բազայի շարունակական հարստացումն ու հնարավորությունների բարելավումը:
Հայաստանում և հայերենով գործող հոգևոր բնույթի կայքերի թիվը խիստ սահմանափակ է, իսկ բովանդակությունը` հաճախ լրացման կարիք ունեցող: Ուստի և անհրաժեշտ համարեցինք օգտագործել ուսուցման, հաղորդակցման և պայքարի արդիական այնպիսի միջոցը, ինչպիսին է էլեկտրոնային կայքը:
Կայքի խնդիրները
ա/ Ազգային Եկեղեցու ճանաչում և հաղորդակցում
Նպաստել Հայոց Եկեղեցու մասին տեղեկատվության մատչելիությանը` դրանով կայքի այցելուին հաղորդակից դարձնելով Եկեղեցուն: Սա իր հերթին ենթադրում է դավանաբանության և վարդապետության սկզբնադրույթների մատչելի մատուցում և անաղարտ պահպանում, դրա հիման վրա առկա զանազան գաղափարների, դրանցից բխող վարքի նորմերի ճշտում, կատարվող երևույթների մեկնաբանում:
Հայոց Եկեղեցու գործունեությանը ազգի մասնակցության աստիճանի բարձրացում, ինչը ենթադրում է ծեսերի, տոների, Եկեղեցու փրկարար, մխիթարիչ դերի ու նշանակության մասին հանրության իրազեկում:
բ/ Հոգևոր անվտանգություն
Քրիստոսի մարտնչող եկեղեցիներից նաև Հայոց Եկեղեցին պետք է ապահովի ի վերուստ իրեն վստահված հոգիների հոգևոր անվտանգությունը: Սա ենթադրում է ուղղափառ հավատքի պահպանում, դրանից բխող վարքի և ապրելակերպի նորմերի մատուցում, մոլորությունների և մոլորեցնողների, այդ թվում նաև կրոնական աղանդների բացահայտում, նրանց ուսմունքի և իրական նպատակների, կատարած չարագործությունների, օգտագործած մեթոդների մերկացում և մարդկանց իրազեկում:
գ/ Այլ եկեղեցիների և կրոնական հարանվանությունների ճանաչում
Անհրաժեշտ տեղեկատվության ապահովում քրիստոնեական եկեղեցու այլ ճյուղավորումների ծագման, առանձնահատկությունների, ներկա վիճակի և Հայոց Եկեղեցուց ունեցած տարբերությունների, ինչպես նաև աշխարհում գործող հիմնական կրոնների և աղանդների ու պաշտամունքների մասին:
դ/ Տեղեկատվություն կրոնական հաստատությունների ունեցած կարգավիճակի մասին
Աշխարհում և Հայաստանում գործող զանազան եկեղեցիների, կազմակերպությունների ու պաշտամունքների ունեցած իրավական կարգավիճակի և այլ փաստերի մասին տեղեկագրության և լուրերի մատուցում:
ե/ Կապի ապահովում
Գործուն կապի հաստատում ՀԱԵ-ի ներքին և արտերկրյա թեմերի և շահագրգիր կազմակերպությունների, անհատների, համանման կայքերի, աղանդավորության գործունեությունն ուսումնասիրող կազմակերպությունների հետ:
Ժամանակի ընթաքում օտարալեզու էջերի ստեղծումը հնարավորություն կտա Հայոց Եկեղեցին առավել լայն ներկայացնելու աշխարհին, ծանոթություն հաստատելու նաև օտարերկրյա զանազան կազմակերպությունների հետ` ընդլայնելով կապերի միջազգային ցանցը:
Այնպես որ, բարեկա´մ, եթե քեզ հետաքրքրում են տեղեկություններ Մայր Եկեղեցու, ինչպես նաև վերոհիշյալ թեմաների մասին, ապա օգտվիր մեր կայքից:
«Զվարթնոց» տեղեկատվական-վերլուծական կենտրոնՀասցե` Երևան, Իսրայելյան փ. 21Հեռախոս` 52-79-22Էլ. փոստ` zvartnoc@arminco.com